“Bilduren intentzioa, Eibarko bizilagunen zabor poltsen edukia publikoki erakustea da” ohartarazi du hautagai jeltzaleak. “Orain aurkakoa badiote ere, jarraitu du zinegotzi jeltzaleak, Gipuzkoarako Bilduren eredua atez atekoa da, edo ez al dute inposatuko atez atekoa horretarako gehiengo nahikoa lortzen badute?” galdetzen du. Kasu horretan, jeltzaleek ez dute inongo dudarik, Bilduk, Gipuzkoako beste herri askotan egin duen bezala, atez atekoa inposatuko luke. Eva Juezek azpimarratu du, bere udal taldeak ez duela onartuko eibartarren intimitatea errespetatzen ez duen ekintzarik aurrera eramatea.

Inposaketa eta kontrolaren ordez, EAJ herritarren kontzientziatzearen, birziklatzearen, prebentzioaren, konpostatzearen, eta berrerabiltzearen alde agertzen da. Horregatik, EAJko udal taldeak, 5. edukiontziaren alde egindako apustua berresten du. Mankomunitatea gaikako bilketarako prest dagoenerako, gaikako bilketaren datuak hobetu eta herritarrak kontzientziatzeko asmoarekin, EAJko udal taldeak, Eibarko ikastetxeetan gaikako bilketarako paperontziak jartzea proposatu du, haurrak txikitatik nola birziklatu ikas dezaten, eta pixkanaka, paperontzi selektiboak herri guztira zabaltzea. “Birziklatzea, herritarren kontzientziatzearen eta 5. edukiontziaren bidetik bultzatu nahi dugu, ez kontrola eta inposaketaren bidetik, horregatik, ildo horietatik jarraituko dugu lanean, adostasunaren bidetik, inposaketarik gabe, Eibar ingurugiro aldetik gero eta jasangarriagoa izan dadin” bukatu du Juezek.