EAJ-PNVk ekimen bat aurkeztu du helburu argi batekin: behingoz, Ezkio-Itsasoko biztanleen aldarrikapen legitimo eta iraunkor bati erantzutea. Proposamenaren helburua da indarrean dagoen araudia eguneratzea, argitasun eta segurtasun juridiko handiagoa emateko, eta, horrela, Gipuzkoan Tokiko Erakunde Txiki berriak eratzeko atea irekitzeko. Kontua ez da soilik lege bat egokitzea, baizik eta Lurraldean sakon errotutako eskaera bati erantzutea.

Jeltzaleok uste dugu urrats sendo eta erabakigarri bat emateko unea iritsi dela. Ezkio-Itsaso ez da salbuespena: bere nortasuna, errealitatea eta borondate demokratikoa islatuko dituen tokiko antolaketa nahi duten hainbat eta hainbat herritar ordezkatzen ditu. Hala, Gipuzkoako Foru Aldundia gure ekimenaren alde agertu da, gure proposamenaren tramitazioa babestuz. Areago, erantzukizunez jokatzen denean, irtenbide bidezkoetan aurrera egitea posible den seinale argia da.

EAJ-PNVn, orain arte bezala, jarrera eraikitzailea, baikorra eta akordiora irekia mantentzen dugu. Oraingo honetan, espero dugu akordio zabal bat lortzea talde politiko guztiekin – horien artean, EH Bildu-, auzotarren eskariari erantzuteko, konponbidea eskatzen baitute.

Horrela adierazi du Ianko Gamboa bozeramaileak, “errespetuan, elkarrizketan eta herritarrekiko konpromisoan oinarritutako politika egiteko era defendatzen dugu. Izan ere, lurralde-antolaketaz eta tokiko autogobernuaren forma berrien aitorpenaz hitz egiten dugunean, hurbileko demokraziaz eta benetako parte-hartzeaz ere ari gara”.

Jeltzaleon konpromisoa irmoa da: lan egitea Ezkio-Itsasokoa bezalako kasuek, eta Angiozar bezalako beste gune batzuetakoek, berme osoz garatzeko legezko bide egokia aurkitzeko; zuzentasunez eta erakundeen bitartez, gobernatzea entzutea eta erantzunak ematea sinesten baitugu.