ADELA Euskal Herria erakundeari laguntza emate asmoz, Eibarko EAJk parrilada solidarioa antolatu du datorren astelehenerako, hau da, Arrate egunerako.

Eva Juez bozeramaile jeltzaleak azaldu duenez parrilada solidarioa eguerdiko 12:00tan ospatuko da Arrateko zelaian. “Karlos Ibarrondo parrilero profesionalak egindako Euskal Baserriko Lumagorri Eusko Labeldun oilasko izter pintxoak eskainiko dira 2 euroren truke, eta nahi duenak ere sagardo kupela edota ura edan ahal izango du” adierazi du Juezek.

“Uda honetan asko hitz egin da ELA gaixotasunari buruz martxan jarri den sentsibilizazio kanpaina dela eta, baina badirudi erakundeek ez dutela espero bezalako babes ekonomikorik jaso, gaineratu du Juezek, horregatik, Eibarko EAJk ekimen solidario honen bitartez eskaini nahi dio laguntza erakundeari”.

“Alderdikide eta burukideek parte hartu eta lan egingo dute barraren beste aldean, jarraitu du Juezek, eta itsulapikoak ere ezarriko dira nahi duenak ekarpenak egin ditzan”. Irabazi guztiak, gaixoen bizi kalitatea hobetzeaz eta laguntza eskaintzeaz arduratzen den, ADELA Euskal Herria erakundearentzat izango dira.

Azkenik, jeltzaleek eibartarrak ekimenera etor daitezen gonbidatu eta animatu dituzte guztien artean gaixotasuna jasaten dutenei laguntza eman eta babesa erakusteko.