Etxebizitza eskuratzea arazo nagusietako bat bihurtu da Lezoko bizilagun askorentzat. Prezio altuek, eskaintza eskasiak eta emantzipatzeko zailtasunak bereziki eragiten diete gazteei eta bizi proiektua udalerrian garatu nahi duten familiei.

Oposizioan dagoen EAJ-PNVren udal taldearen ustez, errealitate horrek EH Bilduren Udal Gobernuaren erantzun argia eta planifikatua eskatzen du. “Ez gaude arazo puntual baten aurrean, arazo estruktural baten aurrean baizik. Gero eta pertsona gehiagok dituzte zailtasunak Lezon etxebizitza duin bat lortzeko, eta irtenbideak eskaintzea udal politikaren ardura da”, adierazi dute.

Lurzoru erabilgarria eta jarduteko beharra

EAJ-PNVk egoera horri aurre egiteko biderik eraginkorrenetako bat babes ofizialeko etxebizitza berriak sustatzea dela defendatzen du, eskaintza arrazoizko prezioetan zabaltzeko eta lezoarrek beren herrian jarrai dezaten errazteko.

Ildo horretan, talde jeltzaleak Olatzarren dagoen lursail librea aztertzea eta aktibatzea proposatu du, babestutako etxebizitza berriak eraikitzeko benetako aukera gisa. jeltzaleen ustez, lurzoru hori funtsezko tresna bihur daiteke etxebizitza-merkatuan gaur egun dagoen presioa arintzeko.

“Lursail bat erabilgarri badago, Udalak haren bideragarritasuna aztertu eta urrats sendoak eman behar ditu. Ezin da etxebizitzaren arazoa onartu eta, aldi berean, konpontzeko aukerak pasatzen utzi”, adierazi dute EAJ-PNVtik.

Azaldu dutenez, helburua bikoitza da: gehien behar dutenei etxebizitzarako sarbidea erraztea eta Lezok bizi eta atsegin bat bermatzea, belaunaldien arteko erreleboarekin eta kohesio sozialarekin.