EAJ-PNVren arabera, bereziki larria da udal gobernuak lehenik komunikabideei bidali izana Lurralde Antolamendurako Batzordearen txostenari buruzko informazioa, udal korporazioko taldeei jakinarazi aurretik.

Talde jeltzalearen ustez, gainera, zabaldutako prentsa oharrak zehaztasun eta xehetasun falta nabarmena du. Bertan “doikuntza teknikoak” aipatzen dira, baina ez da azaltzen zein diren aldaketa horiek, ezta PGOUari buruz txostenean jasotzen diren oharren benetako edukia ere.

“Ez da onargarria udal korporazioko taldeak horrelako gai garrantzitsu baten berri komunikabideen bidez izatea, eta gainera informazio anbiguo eta zehaztasunik gabearekin”, adierazi du EAJ-PNVk.

Jeltzaleen arabera, egoera honek berriro ere agerian uzten du udal gobernuak askotan aipatzen duen parte-hartze eta gardentasun eredu hori ez dela benetan praktikan jartzen.

Horregatik, EAJ-PNVk udal gobernuari eskatu dio berehala bidal dezala Lurralde Antolamendurako Batzordearen txosten osoa udal talde guztiei, eta azal ditzala zein diren PGOUan egin beharko diren aldaketak eta zein izango diren tramitazioaren hurrengo urratsak.

EAJ-PNVren ustez, agerikoa da PGOUaren tramitazioa ez dela behar bezain gardentasunez egiten ari.