EH Bildu gobernuan sartu zenetik, urtetik urtera handitu ditu zergak. Hala eta guztiz ere, “zerbitzuetan ez da hobekuntza nabarmenik egon, eta kanpoko aholkularitzen gastuak igo egin dira", adierazi du talde jeltzaleak. Gainera, azken hilabeteetan 2026 honetarako langileen soldatak izoztu zituztela jakinarazi dute, KPIa kontuan hartu gabe, Euskadiko gainerako erakunde publikoak araudian ezarritakoaren arabera eguneratzen ari diren arren. “Horrek Lezoko langileekiko konpromiso falta erakusten du, oso egoera harrigarria EH Bildu bezain ezkertiarra omen den alderdi batentzat".

Gainera, EAJ-PNVk kontratazioan gelditasuna, txandakatze etengabea eta Udaleko teknikarien falta salatu ditu. "Azken urteotan Lezoko Udaleko langileen errotazioa oso handia izaten ari da, izan ere, Lezoko Udalean denboraldi bat igaro ondoren, langile askok beste udalerri batzuetara joatea erabakitzen dute. "Dinamika" hori ohiko praktika bihurtzeak kezkatzen gaitu, eta murrizketek eta EH Bilduk langileekin duen konpromiso faltak eragiten dute", azaldu dute.

Beharrezkoak ez diren aholkulariak eta kudeaketa eskasa

EAJ-PNVk kanpoko aholkulari askoren kontratazioa zalantzan jarri du. "Ez dago justifikaziorik aholkulariak masiboki kontratatzeko, oinarrizko zerbitzuen beharrak asetzeko diru nahikorik ez dagoenean", adierazi du alderdi jeltzaleak. "Baliabide horien kudeaketa berrikustea beharrezkoa da, diru publikoa modu eraginkorrean eta lezoarren benetako onurarako gastatuko dela bermatzeko".

EAJ-PNVk beharrezkoa ez den gastua murrizteko eta herritarren ongizatea lehenesteko eskatu dio Udal Gobernuari, bereziki zerbitzu publikoen hobekuntzari eta udal langileekiko konpromisoari dagokienez, horiek baitira benetan zerbitzu horiek ematen dituztenak. "Egungo kudeaketa ereduak egoera jasanezin baterantz darama Lezo. Gastuak lehenbailehen berrikustea eskatzen dugu, baita teknikarien lan-baldintzak hobetzea ere, udalerriko zerbitzuak hobetu ahal izateko ", amaitu du taldeak.