Oiartzungo EAJ-PNVk Lanbarrengo industrialdearen ikuspegi integral eta modernizazio plan ezaren aurrean, kezka azaldu du. Azken urteetan inbertsioak egin diren arren, batez ere mantentze lanetan eta konponketa puntualetan, oraindik ez da osatu eremuaren garapen kohesionatu eta jasangarria bultzatuko duen epe luzeko estrategiarik.

Janire Mitxelena Oiartzungo EAJ-PNVko bozeramaileak azpimarratu duenez, "orain arte egindako inbertsioak beharrezkoak izan dira, baina ez nahikoak. Unean uneko arazoei erantzun bazaie ere, ez da inguruaren modernizazioa modu globalean bultzatuko duen plangintza sendorik egin". Mitxelenak adierazi duenez, segurtasun-, irisgarritasun- eta mantentze-kontuetan aurrerapenak egon badira ere, oraindik zeregin asko daude egiteke Lanbarren motor ekonomiko berritu bihurtzeko.

Agintaldietan zehar, EH Bilduren udal gobernuak hainbat inbertsio egin ditu, baina inbertsio horiek batez ere berehalako beharrak konpontzera bideratu dira, epe luzerako garapen eredu bat sortzeari jaramonik egin gabe. EAJ-PNVren arabera, plan estrategiko bat behar da, industria azpiegiturak mantentzea ez ezik, modernizatzea eta hobetzea ere jasoko duena, inbertsioak etorkizuneko ikuspegi argi batekin lerrokatuz.

"Funtsezkoa ez da bakarrik gastuak egiten jarraitzea, baizik eta gastu horiekin batera plangintza zehatz bat egitea, epe luzera Lanbarrenen hazkundea eta jasangarritasuna bermatzeko", adierazi du Mitxelenak. "EAJ-PNVren helburua inbertitutako euro bakoitza modernizazio estrategia koherente eta egituratu baten parte izatea bermatzea da".

EAJ-PNVk Lanbarrenerako egindako proposamenak funtsezko hiru zutabe ditu:

        1.- Irisgarritasuna eta segurtasuna: Garraio azpiegiturak hobetzea eta industria eremuan mugikortasun arina bermatzea.

        2.- Estetika industriala: Espazio industrialak birgaitzea, erakargarriagoak eta funtzionalagoak izan daitezen.

        3.- Mantentze-lanen plangintza: Epe luzerako mantentze-plan egituratua sortzea, esku-hartze erreaktiboak saihestuz eta azpiegiturak egoera onean daudela ziurtatuz.

Ardatz horiekin, EAJ-PNVk Lanbarrenek bere garrantzi industriala mantentzeaz gain, etorkizunean modernizazioaren eta jasangarritasunaren eredu ere bihurtuko dela ziurtatu nahi du. "Kontua ez da diru gehiago gastatzea, modu estrategikoan inbertitzea baizik", amaitu du Mitxelenak.