Ordiziako EAJ-PNV udal taldeak Elkarbizitzarako Ordenantza berri bat egiteko proposamena aurkeztu du, espazio publikoen erabilera arduratsua bermatzeko, herritarren arteko errespetua sustatzeko eta herri-ingurunea babesteko helburuarekin. Ekimenaren helburua, dauden araudiak eguneratu eta bateratzea da udalerriaren egungo beharretara egokituz.

Proposamenak funtsezko 16 alorretako neurri jasotzen ditu, espazio publikoa zaintzetik, zarata, garbiketa eta mugikortasuna arautzeraino, Ordizia garbiago, seguruago eta pertsona guztientzako irisgarriago baterantz aurrera egiteko.

Proposatutako gaien artean espazio publikoa babestea, lorategiak eta parkeak zaintzea, eta espazio publikoak garbitzea daude, udalerria egoera onean mantentzeko betebehar eta portaera egokiak sustatzeko.

Ordenantzak hondakinen kudeaketa zuzena ere arautzen du, zaborrak biltegiratzeari eta bereizteari arreta berezia eskainiz, baita edukiontzien inguruan sortutako hondakinen kudeaketa ere, ingurune garbi eta ordenatua sustatzeko.

Beste esparru nabarmenetako bat bide publikoan merkataritza- eta industria-jarduerek duten eragina da, hala nola espaloiak okupatzea edo kanpoko elementuak jartzea, obrak egitearekin batera, ordutegiak, zaratak eta segurtasun-neurriak arautuz, herritarrei ahalik eta eragozpen gutxien eragiteko. Proposamenak, halaber, animalien edukitza eta kontrola jorratzen ditu, animalien bizikidetza eta ongizatea bermatuz.

Gainera, lokal itxiei mantenua ematea aurreikusten da, herria hondatzeko arriskuak eta egoerak saihesteko; zarata eta kutsadura akustikoa kontrolatzea, bai musikagatik, obrengatik, trafikoagatik edo ostalaritzako jarduerengatik; eta argiztapen publikoa eta segurtasuna hobetzea, batez ere argiztapen arazoak dauden eremuetan. 

Ordenantzak garraio publikoa, bizikletak eta patineteak erabiltzeko irizpideak ere jasotzen ditu, oinezkoen lehentasuna eta bidegorrien erabilera egokia bermatuz, baita ekitaldi eta jai publikoen erregulazioa ere, garbiketa eta segurtasun baimenak eta neurriak ezarriz.

Joseba Aranburuk, EAJ-PNVk Ordiziako Udalean duen bozeramaileak, adierazi duenez, “ordenantza honek elkarbizitza eta elkarrekiko errespetua indartu nahi ditu, guztiok partekatzen ditugun espazioak zaintzen lagunduko duen esparru argi bat eskainiz”.

Aranburuk gaineratu duenez, “Ordiziak arau eguneratuak, argiak eta udalerriko errealitatetik pentsatuak behar ditu, bizi kalitatea, hiri jasangarritasuna eta segurtasuna hobetzen laguntzeko, eskubide eta betebeharren arteko oreka ahaztu gabe”.

Ordiziako EAJ-PNVk azpimarratu du proposamen hau asmo eraikitzailearekin eta elkarrizketarako bokazioarekin sortu dela, udalerriari tresna erabilgarri bat emateko, bizikidetza ordenatuagoa, errespetuzkoagoa eta herritarren egungo premiekin bat datorrena lortzeko.