Eskoriatzako EAJ-PNV udal taldeak Luis Ezeiza ingurua berrurbanizatzea proposatu dio Udalari. Jarduera hori egiteke dago, eskola publikoaren eta Santa Ana auzoaren arteko lotura hobetzea ahalbidetuko lukeena, eremu degradatu bat txukunduko lukeen pasabide irisgarri baten bidez.

Aurreko legegintzaldietan, EAJ-PNVk obra garrantzitsuak bultzatu zituen eskola publikoan (teilatua eta eguzki plakak konpontzea, eraikinaren barrualdea hobetzea), baina kanpoko espazioak eraberritu gabe geratu zen, bereziki aipatutako pasabide irisgarria, baita pilotalekuaren aurreko ingurua berritzea ere.

Antonio Regaño EAJ-PNVko bozeramaileak adierazi duenez, “jarduera horrek aukera emango luke hainbat belaunaldik partekatzen duten eskola-ingurunea eraldatzen eta hobetzen jarraitzeko. Luis Ezeizaren gunea funtzionala, segurua eta atsegina izatea nahi dugu, adin desberdinetako pertsonentzako topagunea”. Horretarako, aipatutako hobekuntzak eta aisialdiaz gozatzeko ekipamendua jartzea proposatzen dute.

Eskoriatzako EAJ-PNVren ustez kalitatezko espazio publikoetan inbertitzea bizikidetzan eta ongizatean inbertitzea dela, eta Udalari dei egiten dio bere hirigintza plangintzaren barruan proiektu hau lehenesteko.