Eragiketa honekin, udalerriak eremu estrategiko bat berreskuratzen du, bizitza, jarduera eta aukeren gune berri bat bihurtzeko.

Eric Galvez alkateak azpimarratu duenez, erabakiak "etorkizuneko ikuspegi argi bati erantzuten dio: espazio horrek herriarena izan behar zuen berriro". Erosketa horri esker, 200 etxebizitza inguru eraiki ahal izango dira (hauetatik %40ak gutxienez nolabaiteko babes erregimena izango du) etxebizitza-eskaera gero eta handiagoari erantzuteko, eta hiri-berroneratze integralerako atea ere irekiko du. 

Hamarkada askotan, papeleraren ingurua atzeratuta, degradatuta eta udalerriaren egunerokotasunetik deskonektatuta geratu da. "Gaur eraldatzen hasiko gara, eta etorkizun oparoa eta ilusionagarria lortzeko lehen urratsa emango dugu", nabarmendu du Galvezek. Espazio hori berreskuratzeari esker, hiri-eremu moderno, ordenatu, iraunkor eta herriaren bizitzan erabat integratua sortuko da.   

Hala, elementu nabarmenetako bat ibaiaren birnaturalizazioa izango da, gaur egun egitura eta kanalizazioen azpian baitago. "Gure nortasunaren parte den ura berriro ikusi eta entzungo dugu. Ibaia nabarmen hobetuko da eta presentzia berreskuratuko du, auzoarentzat eta Legazpi osoarentzat ingurune naturalagoa eta osasungarriagoa eskainiz ", adierazi du alkateak.      

Etorkizuna herriarena da

Erosketak ez du soilik ahalbidetzen hiri-garapen orekatua planifikatzea etxebizitzen eraikuntzarekin. Aipatzekoa da, halaber, Lenbur Fundazioaren Patronatuan lortutako akordioa; EAJ-PNV, PSE-EE eta EH Bildu Legazpiko Udalean ordezkatuta dauden alderdietako kideek hartzen dute parte akordio horretan, besteak beste, eta balio handiko zerbait bermatzen da herriarentzat: egunen batean Fundazioak bere jarduera etengo balu edo desagertuko balitz, Chillida Lantoki museoa eta errota udal jabetzakoak izango lirateke. Udalerriaren kultura-ondarearen babesa indartzen duen neurria da.

Legazpi aukera gehiagorekin   

Eragiketa honekin, Udalak berretsi egiten du anbizioz aurrera begiratzen duen udal-ereduarekin duen konpromisoa, bere ingurua zaintzen duena eta belaunaldi berrietan pentsatzen duena. “Legazpik erabakitasunez egiten du aurrera. Espazio degradatu bat berreskuratzen dugu, ibaia hobetzen dugu, etxebizitza sortzen dugu eta, batez ere, legazpiarrentzat aukera berriak sortzen ditugu”, amaitu du Gálvezek.