"Legegintzaldiaren hirugarren urtean sartu gara, eta diseinuan eta plangintzan egindako lan handiari esker, lehentasunezkotzat jo genituen proiektuak ikusarazten eta errealitate bihurtzen hasi dira", azaldu du Jorge Segurado alkateak. Adibide gisa jarri ditu Lasarte-Oriarako errepidea, Idiazabal kalearen bulebarizazioa, argiteria LEDra aldatzea, Egapeko DBHko eraikin berria eraikitzeko obraren hasiera edo etxebizitza berriak garatzeko bidean emandako urratsak. "Gure herriaren etorkizuna eraikitzeko oinarri on bat finkatu dugu, eta urte berriari ilusio handiz ekingo diogu, orain arte egindako guztiagatik eta etortzeko dagoenagatik", gaineratu du.

Etxebizitza

Legealdi honetarako Gobernu Taldeak ezarritako helburu garrantzitsuenetako bat etxebizitza garatzea da, Seguradok nabarmendu duenez: "2026an Babiloniako 32 HEA eremua garatzen hastea aurreikusten da. Eremu horretan, 340 etxebizitza eraikiko dira, eta horietatik %75 babestuak izango dira, 187 BOE eta 68 tasatuak. Oso berri ona gure udalerriarentzat eta euren bizi-proiektua herrian izaten jarraitu nahi duten urnietarrentzat”.

Gizarte-arloa

Gizarte eremuan "zaintza arloan erreferente bihurtu nahi dugu" azaldu du Seguradok. "Eredu propio baterantz eraldatzen ari gara, gure adinekoak eta pertsona zaurgarrienak zaindu, babestu eta artatzeko erreferentziazko administrazioa izan nahi baitugu, eta, horretarako, gure eredua diseinatzen ari gara". Ildo horretan, laguntza etxebizitzen zerbitzua abian jartzea eta Zaintza Mahaia eratzea goraipatu ditu.

Proiektu garrantzitsuak

Proiektuei dagokienean, 2026an egingo diren inbertsio garrantzitsuenak azpimarratu ditu: "atletismo-pista eta futbol-zelaia berritzea eta kanpoko harmailak estaltzea". Gainera, lizitatzen ari diren zenbait obra hasiko dira: Aranzubiko aldapan arrapala mekanikoak jartzea, San Juan 21-29 eta San Juan, 32-40 urbanizatzea, Teresa Amuategi parkea estaltzea eta Etxeberri plazan kirol-gune bat egitea.

Halaber, brigadarentzako bi ibilgailu erosiko dira, birziklatze-poltsak eskuratzeko makina berri bat jarriko da kiroldegiko sarreran, eta aire girotua jarriko da Elkarteen Etxeko bigarren solairuan, bero handiko egunetan adineko pertsonei zerbitzua emateko, aterpe klimatiko gisa.

Honako proiektu hauek idaztea ere aurreikusten da: Egape eraikinaren inguratzailea (energia-eraginkortasuna), Zabaleta auzoa berritzea eta Babiloniarekin konexioa, eta Xoxokako balizko pilotalekua.

Bestalde, udal saneamendu sarearen jasotze digitalarekin jarraituko dela kontatu du Seguradok, Europako "Next" funtsekin eta hornidura eta saneamendu sareko hobekuntzekin batera.

Eta landa-inguruneari dagokionez, landa-bideak hobetzeko partidari eutsiko zaio. Era berean, landa-lurzatien mugak digitalizatzearen aldeko apustua egiten jarraituko da, eta 2026an 3. eta 4. poligonoak altxatuko dira, aurten 6. poligonoa martxan jarri ondoren.

Horretaz gain, gogoratu du 2026an hasiko duela Aldundiak Plazaolako bidegorria egiteko obra, Urnieta eta Lasarte-Oria lotuko dituena.

Elkarte-ehuna

Tokiko elkarte eta eragileek egiten duten lan bikaina babesten segiko da, eta, oro har, hitzarmenak areagotzea aurreikusten da. Easo abesbatzarekin udal-abesbatzarako hitzarmena finkatu da, eta kontuan hartu behar da parte-hartzaileen kopurua asko murriztu dela eskola-kirolean (%60 inguru).

Partaidetza

Parte-hartzea berriz ere funtsezko ardatza izango da Gobernu Taldearen politikan, eta hainbat prozesutan egongo da presente: txosnen ordenantzaren lanketan, gazteen aisialdiari buruzko azterketan eta aurrekontu irekietan. Zentzu horretan, 2026an, herritarrek berriki aukeratutako hiru proiektu egingo dira: hilerriaren inguruan komun publiko bat jartzea, Maximo Yurramendi kalea asfaltatzea eta kalistenia parke bat eraikitzea. Proiektu horiei gehitu beharko zaie LH6ko ikasleek proposatzen dutena. "Eta datorren urteko prozesua honen formatu berean mantentzen da, lehen fase batean proiektuak proposatuz eta bigarrenean horiek aukeratuz".

Euskara

Gainera, alkateak azpimarratu du euskara bultzatzen jarraituko dela urnietarren prestakuntza sustatuz, bai helduengan, bai adin txikikoengan. Halaber, udalerrian gure hizkuntzaren erabileraren diagnostikoa egingo dela aurreratu du.

Agerraldiari amaiera emateko, Seguradok adierazi du, bere ustez, abenduaren 18an egingo den osoko bilkuran bozkatuko den 2026rako aurrekontu proiektuak "Urnietaren etorkizuna anbizioz diseinatzeko aukera" emango duela.