Aparkalekua ez da arazo berria Pasaian; urteak daramatzagu pasaitarren eta bisitan etortzen zaizkigun pertsonen beharrak asetzeko aparkaleku falta jasaten, bai lan egiteko, gure ingurunea ezagutzeko, bai gure saltokietan erosketak egiteko. Loreto Osa bozeramailearen iritziz, “arazo izugarri konplexua da, Pasaiak ez baitu ia espazio fisikorik hazteko, eta, beraz, ez dugu ulertzen urteetan EH Bilduk promesa faltsuak eta arazo horri irtenbideak agindu izana”.

Bozeramaile jeltzalearen arabera, “agerikoa da orain agindutako irtenbide magikoak bueltan datozkiela”. EAJ-PNVtik gogorarazi du dagoeneko urtebete igaro dela aparkatzeko ordenantza hasieran onartu zenetik, eta salatu dute oraindik ez dagoela erabat ezarrita. Osaren arabera, “bi aldiz larria da ordenantza ezartzen hasi eta sei hilabete baino gutxiagora ordenantza aldatu behar izana”.

Txartelak berandu iristen ari dira, ez dago ordenantzaren inplementazioari buruzko informazio argirik, eta herritar askok ez dituzte argi egoiliarrentzako eremu esklusiboak, mistoak edo libreak. Argi dago ez dela akordiorik lortu Portu Agintaritzarekin, eta horrek babesgabetasun handia sortzen du herritarrentzat, ez baita inolako azalpen formalik egon ezarritako kautelazko neurrien irismenari buruz.

Loreto Osak deitoratu duenez, “EAJ - PNVren udal-taldeak txosten juridiko bat eskatu zuen neurri horien irismenari buruz, eta, EH Bilduren eta Podemosen udal-gobernuaren aldetik ohikoa den bezala, ziurtatu ziguten txostena bidaliko zigutela, eta udal arduradun juridikoarekin bilera bat egitea ere proposatu ziguten, baina eskaera egin zenetik hilabete baino gehiago igaro bada ere, ez dugu inolako berririk jaso”.

EAJ-PNVren ustez, inprobisazio bat bestearen atzetik da, eta, bistakoa denez, proposamen handiak egiten dituzunean, funtsezkoa da proposamen horiek aldez aurretik landuta eta adostuta egotea, bestela gaur egun Pasaian gertatzen ari dena gertatzen ari baita

Izan ere, Antxon jada aldaketa bat ezarri behar izan dute egoiliarren eremuan, egoiliarren plazak behar bezala kalkulatu ez zirelako, eta, gobernu taldearen hitzetan, “egoiliarrentzako espazioak soberan zeudelako”. Jeltzaleek adierazi dutenez, “udal gobernutik esan digute ordenantza bizia dela eta aldaketak egin ditzakeela”,baina praktikan "etengabeko inprobisaziora jolasten ari dira, inolako zorroztasunik gabe".

Zentzugabekeria horren beste adibide argi bat saltokiek eta ostalariek duten arazoa da; izan ere, bezero askok ezin izango dute beren negozioetan sartu aparkalekurik ez dutelako. Eremu mistoetako ordutegiek ez dituzte merkataritza-ordutegiak betetzen, ezta asteburuetan ere. Beraz, aparkaleku arauturik ez dagoenez, "ondorio latzak izango ditu gure merkataritza- eta ostalaritza-sarean". "Gure ustez, lehentasuna eman behar zaio Pasaiako herritarrei, baina ez da ahaztu behar jarduera ekonomikoa ez dela alde batera utzi behar, funtsezko funtzioa betetzen baitu udalerrian", ohartarazi du Loreto Osak.

EAJ-PNVk egoera hori arautzeko beharra ulertzen du, baina Teo Alberroren Gobernuari askotan eskatu zaion bezala, beharrezkoa zen aldez aurretik azterketa serio bat egitea aparkatzeko dauden plazei buruz, epe ertainerako aurreikuspen bat eginez, herritarrak nahasmen handiagora eraman aurretik eta etengabeko inprobisazioak metatu behar izan aurretik. “Ez dago daturik zenbat egoiliar plaza margotu diren jakiteko, ez dago ez lanik ez aurreikuspen errealik, eta, horregatik, ordenantza partzialki martxan egon den sei hilabeteetan aldatu egin behar izan da", deitoratu dute jeltzaleek.

Bozeramailearen hitzetan, “gehien tristatzen gaituena da arazo bat konpontzeko adostasunetara iristen saiatu beharrean, itsutu egin direla eta, edozein neurri adostu beharrean, alkatetzaren dekretuen kolpez gobernatzen ari direla, eta horrek aurrera egitea dakar, arazoei aurre egin eta irtenbideak jartzen saiatu beharrean”. Hala eta guztiz ere, Loreto Osak eskua luzatu dio udal gobernuari: “EAJ-PNV beti egongo da prest lan egiteko eta akordioak lortzeko, baina inoiz ez dugu lagunduko horrelako zentzugabekeria zuritzen edo justifikatzen”.