Zumaiako EAJ-PNVk 10 hobekuntza proposamen aurkeztu ditu 2026ko udal aurrekontuetarako, guztira 1.028.000 euroko inbertsioarekin. Proposamen horiek udalerriko bizitzaren funtsezko hainbat alderdi hobetzeko diseinatuta daude, hala nola herritarren parte-hartzea, mugikortasunaren iraunkortasuna, azpiegituren hobekuntza eta kolektibo kalteberenei laguntzea.

Proposamenak funtsezko arloetan zentratzen dira, hala nola mugikortasun jasangarria, azpiegitura publikoen berrikuntza, kirola, kolektiboen ongizatea, etxebizitza eta udal ondarearen kudeaketa. EAJ-PNVk ezinbestekotzat jotzen du 2026ko aurrekontuak herritarren benetako beharrak islatzea, eta, horretarako, proiektu horiek datorren ekitaldian gauzatzea ahalbidetuko luketen neurri zehatz eta bideragarri batzuk proposatu ditu.

Hobetzeko 10 proposamenen artean, honako hauek nabarmentzen dira:

Herritarren parte-hartzea eta gardentasuna:

► 5.000 €, osoko bilkurak grabazio eta streaming bidez zuzenean jarraitzeko aukera gaitzeko, herritarrak une oro informatuta egon daitezen.

Mugikortasun Planeko ekintzak:

► 140.000€ bizikletentzako aparkalekuen sarea handitu eta indartzeko funtsezko puntuetan, hala nola tren geltokian, kiroldegian eta Amaia plazan.

► 30.000€ karga elektrikoko puntuak instalatzeko, mugikortasun berdea sustatzeko eta etxeetan edo lantokietan kargarik ez dutenei estaldura emateko.

Hiri-azpiegiturak:

► 200.000 € herriko haur-parkeak berritzeko.

► 56.000€ Zumaiako gune estrategikoetako bainu publikoen zerbitzuak berritzeko eta hobetzeko.

Kirola:

► 90.000€ kiroldegiko gimnasioko eta itxas kiroldegiko makinak berritzeko. Premiazko ekintza da, egungo ekipoen egoera txarra dela eta.

Kolektiboen ongizatea:

► 200.000€ erretiratuen etxean aire girotuko sistema bat instalatzeko, 2024ko martxoko Osoko Bilkurak larrialdi klimatikoko testuinguru batean beroaren aurkako babeslekuak sortzeko aho batez hartutako erabakia betez.

► 92.000€ ikuspen gutxiko eremuetan argiztapen publikoaren intentsitatea handitzeko, bide publikoko segurtasuna hobetzeko.

Etxebizitza:

► 200.000€ lursailak erosteko eta etxebizitza babestuen ekimenak bultzatzeko, hazten ari den udalerri batean etxebizitza eskuratzea errazteko.

Udal-ondarea:

► 15.000€ udal-eraikinak aztertzeko, Udalaren jabetzak katalogatzeko eta erabilera egokia zehazteko.

Aurrekontua udalerriaren benetako beharretara egokituz proposamen horiek beharrezkoak direla zumaiarren bizi-kalitatea hobetzeko azpimarratu du EAJ-PNVk. “Neurri horiekin, uste dugu Zumaiak jauzi kualitatiboa eman dezakeela arlo askotan, azpiegitura, mugikortasuna, ongizatea eta herritarren parte-hartzea hobetuz”, adierazi dute udal taldetik.