Soraluzeko EAJ-PNV udal taldeak zalantzak azaldu ditu Irisgarritasun Unibertsaleko Plan Integral berriaren inguruan. Dokumentua sakon aztertu ondoren, jeltzaleek ohartarazi dute funtsezko bi alderditan ez dagoela bermerik: exekuzioaren kronologian eta proiektuen finantzaketan.

“Planak legegintzaldi honetatik askoz haratago doazen jarduerak jasotzen ditu, baita hurrengoak ere, aurrekontu konpromisoak eta horiek finantzatzeko modua zehaztu gabe”, adierazi du Iker Aldazabal udal bozeramaileak. “Jarduera gehienak kanpo finantzaketa lortzearen mende daude, baina ez da zehazten EH Bilduren gobernu taldeak zer kudeaketa egin dituen funts horiek bermatzeko. Ezin da benetako konpromisoaz hitz egin aurreikuspen ekonomiko zehatzik gabe”.

EAJ-PNVk azpimarratu du irisgarritasuna pertsonen ongizateari eta autonomiari zuzenean eragiten dion lehentasuna dela, eta, beraz, ezin dela ariketa tekniko hutsean geratu. “Paperak dena jasaten du, baina garrantzitsuena da proposamenak Soraluzeko kale eta eraikinetan hobekuntza ikusgarri bihurtzea”, adierazi du Aldazabalek. “Benetan udalerri inklusibo bat nahi badugu, plan bideragarri bat behar dugu, finantzaketa ziurtatuarekin eta exekuzio egutegi argi batekin”.

Horregatik guztiagatik, talde jeltzaleak Udal Gobernuari eskatu dio agerraldi publiko bat antola dezala planaren edukia eta herritarren aurrean dituen konpromisoak azaltzeko. “Gardentasuna eta parte-hartzea funtsezkoak dira. Bizilagunek zer egingo den, noiz eta zer baliabiderekin zuzenean ezagutzea nahi dugu ”, amaitu du Aldazabalek.