Ordiziako EAJ-PNVko udal taldeak berriro eskatu dio EH Bilduko gobernu taldeari Hiri Antolamenduko Plan Orokorra (HAPO) berraztertzeko, udalerriaren etorkizuneko garapena planifikatzeko eta herriak dituen etxebizitza, mugikortasun eta jasangarritasun erronkei erantzuteko oinarrizko tresna baita.

Prozesua 2017an hasi zen, Planaren Aurrerapena jendaurrean jarrita eta herritar askok parte hartu zuten parte-hartze prozesu zabal batekin. “Lan hura partaidetzaren eta etorkizuneko ikuspegiaren adibide izan zen, baina 2019tik Udal Gobernuak erabat geldirik utzi du”, deitoratu du Joseba Aranburu bozeramaile jeltzaleak.

Ordutik, ez da urrats eraginkorrik eman dokumentua berraktibatzeko. “Sei urte igaro dira eta berdin jarraitzen dugu. Ordiziak ezin du jarraitu hazkunde orekatua eta iraunkorra bermatuko duen bide orri urbanistikorik gabe ”, gaineratu du Aranburuk.

Talde jeltzaleak gogorarazi du, gainera, 2025eko Udal Aurrekontuak onartzeko EAJ-PNVren baldintzetako bat izan zela, hain zuzen ere, 2024an Plan Orokorra idazteari berriro ekiteko konpromisoa, “EH Bilduk bete ez duen konpromisoa”.

“Plangintzarik gabe ez dago aurrerapenik. Plan Orokorra ez da dokumentu tekniko bat gehiago, Ordizia nola haztea nahi dugun, etxebizitzak non eraikiko diren, zein espazio babestuko diren eta mugikortasuna nola antolatuko den definituko duen esparrua da. Etorkizuneko tresna bat da, eta egungo udal gobernuak ahaztuta utzi du”, azpimarratu du Joseba Aranburuk.

EAJ-PNVk azpimarratu du hirigintza-garapenak ezin duela itxaroten jarraitu: “Ordiziak etorkizunari begira egongo den Plan Orokor bat behar du, bere bizilagunen benetako beharretan pentsatuko duena, eta hiri bizigarriagoa, berdeagoa eta orekatuagoa planifikatzeko aukera emango diguna. Hitzetatik ekintzetara pasatzeko garaia da ”.