Lasarte-Oriako EAJ-PNVk euskara sustatzeko konpromisoa berretsi du eta lankidetza-hitzarmenak sinatu ditu hiru ikastetxetako guraso elkarteekin 2025-2026 ikasturterako. Akordio horiek 89.000 euroko inbertsioa izango dute, eta ikastetxeek hainbat jarduera garatuko dituzte euskararen erabilera sustatzeko eta belaunaldi berrien hizkuntza-ohiturak indartzeko.

Estitxu Alkorta, EAJ-PNVko zinegotzia eta Euskara arduraduna, akordioaren garrantzia nabarmendu du: “Lasarte-Oriako gazteek euskara modu naturalean eta egunerokoan erabiltzea da gure helburua. Hitzarmen hauek guraso elkarteen lana indartzen dute, eta gure seme-alabei euskaraz ikasteko eta bizitzeko aukera gehiago eskaintzen dizkiete.”

Akordio honen bidez, Lasarte-Oriako Udalak 89.000 euro bideratuko ditu Oriartekide, Landaberri eta Burunzpeko guraso elkarteetara, euskararen erabilera sustatzen duten proiektuak finantzatzeko. Helburua euskararen erabilera handitzea eta hizkuntza-ohiturak indartzea da, bai ikasgeletan bai eguneroko jardunetan.

Aipagarriena:

1.- Mintza ON programaren bidez, komunikazio-gaitasuna hobetu behar duten ikasleei online laguntza eta praktika-saioak eskainiko zaizkie.

2.- Haur Hezkuntzako gurasoentzako euskara eskolak: gurasoek euskarazko gaitasuna hobetu ahal izango dute beren seme-alaben heziketan gehiago inplikatzeko.

3.- Ikasleek euskara bizitzeko aukera gehiago: Egunerokoan euskararen erabilera sustatzeko jarduerak eta dinamikak.

Jeltzaleak nabarmendu duenez, “Euskara ez da soilik ikasgeletan edo aisialdian erabiltzen den hizkuntza; gure kulturaren oinarria da. Gure lanak bermatzen du euskara hizkuntza bizia izatea, gazteen eguneroko bizitzan zein hezkuntzan.

Era berean, akordioek genero-berdintasuna eta hizkuntza-berdintasuna uztartzen dituzte. Estitxu Alkortak adierazi duenez: Ahalegin hau ez da euskara sustatzera mugatzen, baizik eta berdintasunezko gizartea eraikitzera, euskarak eguneroko jardueretan erreferentziazko hizkuntza izatea bermatuz.

Horrelako ekimenen bidez, Lasarte-Oriako EAJ-PNVk azken urteetan lortutako aurrerapenak sendotzen jarraitzen du. Ikastetxeekin eta guraso elkarteekin elkarlanean, udalerriak euskararen erabilera bultzatzen jarraitzen du eskolako zein gizarte-esparruetan.