Arrasateko EAJ-PNVren udal taldeak Maalako Txiki Txokoaren handitze lanak 2025a amaitu baino lehen esleitzea eskatu dio Udalari, espazio berriak 2026ko udaberrian ateak ireki ahal izateko.

“Negua dator eta Txiki Txokoaren erabilera biderkatu egiten da. Arrasateko familiek luzaroan espero zuten zabalkuntza gauzatzeko unea da”, adierazi du Ander Garay EAJko bozeramaileak.

Herritarren eskarian eta EAJren bultzadan oinarritutako proiektua

Txiki Txokoa 2018an sortu zen, EAJ-PNVren gobernuan, arrasatear familien eskaera bati erantzuteko. Ordutik, harrera bikaina izan du guneak, eta udalerriko haurrentzako topagune eta bizikidetza gune gisa finkatu da.

Arrakastaz eta eskaera gero eta handiagoaz jabetuta, 2024ko apirilean, EAJ-PNVk Belaunaldien arteko Batzordean proposatu zuen instalazioak handitzea, ondoko lokala libre geratu zela aprobetxatuz — bere garaian, espazio hori lokal-multzo beraren parte izan zen —.

Zabalkuntzak onespena eta diseinua ditu

Ekimena udal Gobernuak aztertu eta onartu zuen, eta 2025eko otsailean lokal berriaren alokairu kontratua sinatu zen.

Ordutik, Udalak jarduera egokitzeko eta legeztatzeko obren azterketa teknikoa eta aurrekontua landu ditu, eremu bakoitzean eskainiko diren zerbitzuak definituz, 0 eta 2 urte bitarteko haurrentzako espazioa lokal berrian, eta egungoa 2 eta 6 urte bitarteko adingabeentzat.

EAJ-PNVk gogorarazi du proposamenak urtebete baino gehiago daramala mahai gainean, eta dagoeneko bi negu igaro direla, egungo eskaera handiarentzako espazio txikiagoarekin.

“Proiektua onartuta daukagu, lokala alokatuta eta nahikoa soberakin urtea amaitu aurretik proiektuari aurre egiteko. Obrak adjudikatu eta gauzatzeko borondatea baino ez da falta. Orain jarduten badugu, hau izango da lekurik gabeko azken negua, eta hurrengoan, familiek Txiki Txoko duin, zabal eta abegikor batez gozatu ahal izango dute”, azpimarratu du Garay bozeramaile jeltzaleak.