Arrasateko EAJ-PNVren udal taldea kezkatuta agertu da 2025eko aurrekontuaren exekuzioa “oso eskasa” delako, batez ere inbertsioen arloan. Irailean egon arren, inbertsioen kapituluaren exekuzioa %50era baino ez da iritsi, partiden % 63 oraindik erabili gabe daudela, 122tik 67, “eta horrek erakusten du plangintza eraginkorrik eta herriaren garapenarekiko benetako konpromisorik eza”, Ander Garay bozeramaile jeltzaleak nabarmendu duenez.

“Zaila da urtez urte zergen eta tasen igoerak justifikatzea, inbertsioetarako behar direlako aitzakiarekin, inbertsio horiek berak gauzatzen ez direnean. Aurrekontuak ezin du paperean geratzen den asmo onen zerrenda izaten jarraitu. Ekintza behar da, ez promesa hutsak”, azpimarratu du.

Urtez urte errepikatutako proiektuak, baina gauzatu gabe

EAJ-PNVk adierazi du funtsezko hainbat partida urtero errepikatzen direla aurrekontuetan, baina inoiz ez direla martxan jartzen, hala nola:

● Otalora lizentziatuaren eraldaketa (2024ko eta 2025eko aurrekontuak).

● Gudarien plaza eraberritzea (2023, 2024 eta 2025eko aurrekontuak).

● Entzierroetarako segurtasuna handitzeko hesiak (2023, 2024 eta 2025eko aurrekontuak).

● Santa Marina auzoko liburutegia (2024ko eta 2025eko aurrekontua).

● Musakolako auzo gunea (2023, 2024 eta 2025eko aurrekontuak).

● Santa Barbarako Naturaren Haur Parkea (2023, 2024 eta 2025eko aurrekontuak).

Erabili gabeko partidak 2025ean

2025eko aurrekontuan, partida garrantzitsu hauek ez dira erabili oraindik: 

● 736.000 € bidegorrietarako.

● 511.000 € BAZ eraberritzeko.

●  91.000 € Iturbide egoitzako fatxada berritzeko.

●  44.000 € Zalduspeko aparkalekua egokitzeko proiekturako.

 "Ezin dugu onartzen jarraitu aurrekontu bakoitzean funtsezko proiektuak errepikatzea gauzatu gabe. Ezin da paralisia justifikatu 'baliabide faltarekin' 7 milioi euro aurrekontuetan erabili gabe daudenean, eta 16 milioitik gorako gerakina dagoenean. Hau ez da diru kontua, plangintza eta kudeaketa eraginkorraren falta baizik".

PNVren proposamenak: hitzetatik ekintzetara pasatzea

Egoera horren aurrean, EAJ-PNVk proposamen zehatzak aurkeztu ditu egiteke dauden partidak lehenesteko eta hartutako konpromisoak betetzeko:

 ● 2025ean entzierroen segurtasuna hobetzeko hesiak erostea, 2026ko San Joan jaietarako prest edukitzeko.

● Santa Marina auzoko liburutegiko obrak esleitzea 2025ean.

● Bidegorrien obra 2025ean esleitzea. Bidegorri metro bakar bat ere ez da eraiki legealdi osoan.

● 2025ean Iturbide egoitzaren fatxada egokitzeko obrak esleitzea, 2022tik egindako proiektua.

● 2025ean BAZeko obrak esleitzea. EH Bilduren Udal Gobernuak ordutegi murrizketa aplikatu zuenetik, ez du hobekuntzarik egin, eta beharrezkoa da proiektu hau epe laburrean gauzatzea.

Gainera, jeltzaleek ekintza plan argi bat proposatu dute, egiteke dauden partida guztiak 2026ko aurrekontuan sar daitezen, urteko lehen bi hilabeteetan esleitzeko konpromisoarekin.

Gardentasun eta erantzukizun handiagoa

EAJ-PNVk ere gardentasun handiagoa eskatzen du aurrekontua gauzatzean. “Gipuzkoako Foru Aldundiak egiten duen bezala, departamentu bakoitzak onartutako aurrekontua, bere hileroko exekuzioarekin batera, udal webgunean argitaratzea eskatzen dugu, herritar guztiek egiaztatu ahal izan dezaten zertan gastatzen den euren dirua”.

“Proiektuak ez gauzatzea kudeaketa txarraren seinale izateaz gain, arrasatearren konfiantza galtzeko modu bat ere bada. Gardenak izateko, agindutakoa betetzeko eta Arrasateren etorkizunerako benetan garrantzitsuak diren proiektuak gauzatzeko garaia da”, amaitu du Garayk.