Irailaren 10ean Lorategi Hiriko garapeneko bizilagun berriak beren etxebizitza berrien giltzak jasotzen hasiko dira, operazioaren lehen fasea amaitu ondoren. Fase horretan, tipologia desberdinetako 264 bizitoki eraikitzea aurreikusten da.

Urbanizazioaren aurrerapenari esker, gainera, datorren astelehenean Lorategi Hiria kalea ireki ahal izango da, eremu berri honen bide nagusia izango dena. Errei bat izango du noranzko bakoitzerako, eta Loiolako Zeharbideko biribilgune berria Ur Kirolaken parean dagoen biribilgunearekin lotuko du.

Lehenengo etxebizitzak, tipologia librekoak, asteazkenetik aurrera entregatuko dira pixkanaka, eta ibaitik hurbilen dagoen blokeari dagozkio. Gailur promotorea arduratu da etxebizitza horiek eraikitzeaz.

Giltzak ematearekin batera, bide nagusia mota guztietako ibilgailuei irekiko zaie, bizilagun berriei sarbidea bermatzeko. Hala ere, joan den apiriletik garraio publikoa kale horretatik igaro ahal izan da. Espaloiak eta bidegorria ere ireki egingo dira.

Aldi berean, TAO bidez araututako aparkaleku berria jarriko da martxan, kale horren eta Marea Errota parke berriaren artean. Horri esker, Kultur Etxearen aurrean dagoen aparkalekua okupatu ahal izango da, obren makineriarentzako eta materialarentzako gune gisa, urbanizazio-lanen hurrengo faseari ekin ahal izateko. Fase hori auzoko etxeek hartzen duten ingurunean zentratuko da (Urbia kalearen eta bide nagusi berriaren artean). Obren fase hau datorren urteko udaberrira arte luzatuko da.

Denbora gutxi barru saihesbideko taulen azpian dagoen aparkalekuan ere egokitze-lanak egingo dira, eta, beraz, urrian zehar ibilgailuak aparkatzea debekatuko da eremu horretan obrak amaitu arte.

Eneko Goia alkatearen hitzetan, "berri ona da Lorategi Hiriko bizilagun berriek  amaitutako lehen etxebizitzatan sartu ahal izatea. Hainbat tipologiatako etxebizitzak eraikitzeko operazio integrala egingo den espazioa da hau, beste urbanizazio-izaerako jarduketa batzuekin batera: bideak, bidegorriak eta kalitatezko espazioak ibaiaren ondoan".

Goiak azpimarratu duenez, Lorategi Hiria hiriko "lehenengo garapena eta aurreratuena da, baina atzetik Infernua, Illarra, Añorga Txiki, Igara eta beste esparru batzuk iritsiko dira", eta dagoeneko mila etxebizitza inguru eraikitzen ari dira. Hori dela eta, alkateak azpimarratu du Udala "azeleragailua zapaltzen ari dela etxebizitzen eraikuntzan, dauden premiei erantzun ahal izango dieten askotariko etxebizitzak merkatuan jartzeko helburuarekin".

Bestalde, Ane Oyarbide Ekonomia eta Tokiko Enpleguko zinegotziak gogorarazi duenez, "auzo berri honek 264 etxebizitza berri izango ditu, eta horietatik 98 ( % 40) babestuak izango dira, Udalaren eta Eusko Jaurlaritzaren arteko lankidetza-hitzarmenari esker. Era berean, Lorategi-hiriak ekipamendu eta berdegune berriak hartuko ditu, Ciudad Jardín eta Loiolako bizilagunei aisialdirako aukera berriak emateko ".

Zirkulazio aldaketak Loiolan

Lorategi Hiriko bide berriaren irekierak Loiolako trafikoaren berrantolaketa garrantzitsu bat ekarri du, joan den asteazkenetik aurrera gauzatu dena. Horrela, auzorako sarrera kuartelen biribilgunetik egiten da, Urdinzu zubiaren ondoan, eta horrek Aralarko Mendilerroa eta Urbia kaleen norabidea aldatzea dakar.

Gainera, Zubiondoko, Urbasa Mendilerroko eta Plazaburuko zirkulazio-norabidea ere aldatu da, auzoko barne-trafikoa berrantolatzeko.

Aldaketa horiek Loiola auzoko mugikortasunaren diseinu berriaren parte dira, ibilgailuen joan-etorriak optimizatzeko eta, horrela, auzotarren eta auzoaren erabiltzaileen zirkulazioa errazteko.