Zumaiako EAJ-PNV Udal Taldeak salatu du EH Bilduk ez duela inolako aurrerapausorik eman etxebizitza publikoan; izan ere, sei urte daramatza Udal Gobernuan babes ofizialeko etxebizitza bat bera ere sustatu gabe. Bien bitartean, Torreagako 46 etxebizitzak, urtea amaitu baino lehen zozketatuko direnak, EAJ-PNVk 2018an (Udaleko buru zenean), lortutako akordioaren emaitza zuzenak dira.

Une hartan, EH Bildu abstenitu egin zen bozketan, babes ofizialeko etxebizitza gehiago egin zitezkeela esanez. Hala ere, urte hauetan guztietan ez dute ezer egin ehuneko hori handitzeko. "Gaur egun dagoena guk orduan lortu genuena da: etxebizitza tasatuen %20, babes ofizialeko %20, eta gainerakoak libre", gogorarazi du talde jeltzaleak.

Uztaileko osoko bilkuran, etxebizitza horiek eskuratzeko oinarriak onartu ziren. EAJ-PNVk erroldatze-irizpideak hobetzeko proposamen zehatz bat aurkeztu zuen, ia bizitza osoa udalerrian eman duten zumaiarrei sarbidea errazteko, arrazoi pertsonalengatik edo lan-arrazoiengatik alde egin behar izan badute ere.

EH Bilduk onartutako oinarriek azken hamar urteetan bi urtez jarraian edo bost urtez txandaka erroldatuta egotea eskatzen duten bitartean, EAJ-PNVk azken hogei urteetan bost urtez jarraian edo hamar urtez etenaldiekin egon direnei sarbidea zabaltzea proposatu zuen. "Beste udalerri batzuetan aplikatzen denaren antzeko formula bidezkoagoa da", defendatu zuten.

EAJ-PNVtik proiektu honek aurrerapausoak eman izana ospatzen dute; aurretik aipatu bezala, urte amaieran zozketatuko diren Torreagako babes ofizialeko 46 etxebizitzak EAJ-PNVk 2018an lortutako akordioaren emaitza zuzenak direlako.