Ostegun honetan Osoko Bilkuran aurkeztuko den Kontuhartzailetzaren txostenaren arabera, 2024an alkateak kontu-hartzailearen eragozpenen aurkako ordainketa- ebazpenak sinatu ditu 12.342.822 eurotan, hau da, urte horretan onartutako guztizko gastuaren % 43,3 (28.494.445 €). Ia 50 dekreturi buruz ari gara, fiskalizazio-organo teknikoaren aurkako txostena izan arren sinatuta daudenak.

Eragozpen horien arrazoia?

Ohiko moduan lizitazio publikoko prozedurei jarraitu gabe kontratatzen diren zerbitzuetarako kontratu txikia gehiegikeriaz erabiltzea, eta jada iraungita dauden kontratuak dituzten enpresei fakturak ordaintzea. Alkateak berak onartezintzat jotzen zituen praktika horiek oposizioan zegoenean, eta orain administrazio-gai txikitzat defendatzen ditu.

Azpimarratu nahi dugu ondo ezagutzen dugula udal kudeaketaren konplexutasuna.

Badakigu, gobernatu dugulako, eguneroko beharrek batzuetan talka egiten dutela arau-esparruaren zurruntasunarekin, eta batzuetan erabaki zailak hartu behar direla herritarrei erantzuteko. Horregatik sinatu ziren bere garaian zenbait dekretu eragozpenekin. Eta segur aski orain gauza bera gertatzen da.

Baina bada funtsezko ezberdintasun bat:

Lehen salatzen zuenak, orain isilik dago.

Lehen eskandaluez hitz egiten zuena, orain normalizatu egiten du

Lehen onartezintzat salatzen zuena, orain azalpenik gabe sinatzen du

Inkoherentzia bihurtu da gobernatzeko modua. 

Hondarribiko PNVtik gobernu taldeari eskatzen diogu herritarrei gardentasunez eman diezaiela egoeraren berri, beraiek bere garaian eskatzen zuten bezala. Eta txosten teknikoak arma politiko gisa erabiltzeari utz diezaiotela eskatzen diegu, gobernatzeko erantzukizuna ezin baita bi mailatatik gauzatu.