Zumaiako EAJ-PNVk gaitzetsi egin du Udal Gobernuak Erkibe eraikinaren inguruan dauden lorategien birgaitzea lehenetsi izana eraikin historikoaren beraren aurretik. EAJren ustez, plangintza falta hau, eraginkorra ez den kudeaketaren adibide argia da; izan ere, Erkibe ingurua 327.000 euroko aurrekontuarekin birgaitzea esku-hartze partziala da, eta ez du konpontzen benetako premia urgentea: eraikinari erabilera integrala ematea. "Erkibe eraikina ondare baliotsua da Zumaiarentzat, eta osorik birgaitu beharko litzateke. Lorategiak lehenestea aukera galdua da", adierazi du EAJ-PNVko bozeramaileak.

Zentzu horretan, EAJ-PNVren proposamena da, Erkibe, herritarrentzat erabilgarria izango den espazio bihurtzea, eta bertako zerbitzua familiei eta gazteenei zuzendua egotea (hala nola, ludoteka gisa). Hala ere, badirudi egungo gobernuak eraikin hori ahaztuta utzi duela, eta proiektu mugatu batean soilik oinarritu dela.

Ildo horretan, kudeaketa falta ere salatu da: eraikinaren eta inguruaren birgaitze integralak 1,5 milioi euro inguruko kostua izango luke, baina lorategietan soilik 327.000 euroko gastua egiteak lehentasunik eza erakusten du. "Ulertezina da funts horiek lorategi batzuetara bideratzea, Zumaiaren benetako balioa Erkibe eraikinaren birgaitzean dagoenean", adierazi dute EAJ-PNVtik.

Bestalde, jeltzaleek salatu dutenez, Udal Gobernuak 400.000 €-ko dirulaguntza birbideratu nahi du Algorriko birgaitze jasangarrira, 128.364,28 € Santiagoko arrapalera, eta 271.635,72 € Erkibeko lorategira. EAJ-PNVren ustez, birbanaketa hori adabaki bat da, udalerriaren benetako arazoak konpontzen ez dituena, eta behar duen kudeaketa integralari heltzen ez diona.

EAJ-PNVk Zumaiaren aurrerabidearekiko konpromisoa berretsi du. "Kudeaketa eraginkorra izango duen Zumaia bat nahi dugu, bere ondarea errespetatuko duena eta herritarren beharrei erantzungo diena. Proiektu bakoitzak komunitatearen zerbitzura egon behar du", nabarmendu dute.