Soraluzeko EAJ-PNVk EH Bilduri exijitu dio Zuloagako eta Oleako presen eraisketa-proiektuari buruzko aurkezpen publiko bat antolatzea, herritarrei informazio gardena eta zuzena eskaintzeko. Gai garrantzitsu honi buruzko erabakia ez da inposatu behar: partekatu egin behar da, eta erabaki komun baten bidez adostu.

Honakoa izan da, aurten, presen eraisketa proiektuari lotutako prozesuaren kronologia:

     ▼ Otsailaren 10ean, Gipuzkoako Foru Aldundiaren obra hidraulikoetako webgunean argitaratu zen proiektua.

     ▼ Martxoaren 3an, Gipuzkoako Aldizkari Ofizialean jendaurreko informazioaren eta entzunaldiaren izapideak abiarazi zituen iragarkia argitaratu zen.

     ▼ Apirilean, Soraluzeko Udalak zazpi puntuko alegazio-txostena igorri zuen Aldundira.

     ▼ Maiatzaren 20an, Aldundiaren erantzuna jaso zen udal erregistroan.

     ▼ Ekainaren 12an, hirigintzako batzordean, EH Bilduk alegazioen erantzunaren berri eman zuen.

     ▼ Ekainaren 18an, presak iragazkortzeko proiektua onartzen duen 143/2025 Foru Agindua argitaratu zen Gipuzkoako Aldizkari Ofizialean.

Informazio guztia mahai gainean izanda, EAJ-PNVk uste du herritarrei proiektuaren berri eman behar zaiela. "Gardentasuna eta parte-hartzea ez dira lelo hutsa izan behar, praktikan aplikatu beharreko printzipioak baizik", adierazi dute jeltzaleek.

Hori dela eta, informazio-saio publiko bat eta herri-galdeketa bat proposatu dituzte: "Zuloagako eta Oleako proiektuaren inguruan, soraluzetarrek aurkako edo aldeko iritzia emateko aukera izan behar dute”.