EH Bilduk eta Elkarrekin Podemosek osatutako Arrasateko gobernu taldeak %2ko igoera onartu du osoko bilkuran 2025-2026 ikasturterako udal prestakuntza eta kirol zerbitzuen tasetan. Neurri honek zuzenean eragiten dio herritarrek kiroldegiko ikastaroetan parte hartzeagatik, euskara ikasteagatik edo ingurumen eskolako egonaldietara joateagatik beren gain hartu beharko duten kostuari.

Igoera berri hori aurreko urtean aplikatutako %3ko igoerari gehitzen zaio, EAJ-PNV udal taldearen aurkako botoarekin, hau da, bi urtean zerbitzu horiek %5 garestitu dira arrasatearrentzat.

EAJ-PNVk salatu du zerga igoeren politika honek EH Bilduk 2023ko hauteskunde programan agindutakoaren aurka egiten duela zuzenean, non konpromisoa hartzen zuten euskara ikastearen doakotasuna bermatzeko eta erabilera sustatzeko, bai Udalean, bai kalean. Praktikan, euskara ikastea %5 garestiagoa da bi urtean.

Kirol-ikastaroen kasuan, igoera bereziki justifikaziorik gabea da. Ikastaro horiek emateko kontratua 2022an esleitu zen, eta, pleguek jasotzen duten bezala, ez dago prezioak berrikusterik. Horrek esan nahi du Udalak ez diola gehiago ordaintzen enpresa esleipendunari, baina bizilagunak zerbitzu beragatik gehiago ordaintzera behartzen ditu. Erabaki hau iaz ere hartu zen, eta orain berriro errepikatzen da.

Gainera, Udalaren testuinguru ekonomikoak ez du inondik inora justifikatzen igoera hori. Azken bi urteetan, Udalak 28 milioi euroko superabitarekin itxi ditu kontuak.

Udalak ez du zorrik eta finantza-egoera onbideratua du. Hori dela eta, EAJ-PNVk uste du igoera horiek auzokideen gain jartzea ez dela beharrezkoa eta ez dela bidezkoa.

EAJ-PNVren udal taldeak osoko zuzenketa bat aurkeztu du igoera hori geldiarazteko eta tasak dauden bezala mantentzeko. Proposamen hori aintzat hartu ez izana deitoratu dute, eta fiskalitate bidezkoarekin eta udal zerbitzuetarako sarbide bidezkoarekin duten konpromisoa berretsi dute.