Arrasateko EAJ-PNV udal taldeak publikoki salatu du gaur, azken egunotan 25 graduak gainditu dituzten egun ugarirekin, Santa Barbarako eta Villa Amparoko ur-parkeak oraindik itxita jarraitzen dutela maiatzaren amaieran.

Talde jeltzaleak gogorarazi duenez, 2023an, EAJ-PNVren kudeaketapean, parke horiek maiatzaren hasieran ireki ziren, gero eta lehenago heltzen diren bero-boladei aurre egiteko, baita Arrasaten ere.

Jeltzaleen ustez, ez da ulertzen zergatik ez diren prebentzio-neurriak hartu edo aldez aurretik irekiera egoki bat planifikatu, eguraldiaren baldintza errealetara egokituta. “Ez gara aisialdiaz bakarrik ari —gaineratu dute—, baizik eta osasunaz, haurren ongizateaz eta zentzudun izateaz”.

Horregatik, EAJ-PNVk eskatzen dio EH Bilduk eta Elkarrekin Arrasatek osatutako Udal Gobernuari bi parkeak berehala irekitzea, eta uda-kanpaina arduraz planifikatzea, klima-aldaketaren ondorioetara egokitzeko irizpideak barne hartuta.