Urnietako EAJ-PNVren udal taldeak gaur arratsaldean egingo den Osoko Bilkuran aztertuko diren hainbat puntu azpimarratu ditu, azken hilabeteetan udal gobernuaren eskutik bultzatutako proiektuek aurrera egingo dutelako.

Berezien artean daude Egape Ikastolarekin lotutako bi puntu: mantentze- eta zaintza-zerbitzu berria kontratatzea, eta Haur Hezkuntzako eraikinean leiho berriak jartzeko horniketa eta instalazioa. Bi kasuetan, EAJ-PNVren udal taldeak helburu argia izan du: haur eta irakasleen eguneroko baldintzak hobetzea eta eraikinen eraginkortasun energetikoa indartzea.

Era berean, Urnieta-Lasarte arteko bide berria urbanizatzeko lanen epea luzatzeko proposamena aztertuko da. EAJ-PNVren udal taldeak lan horien garrantzia azpimarratu du eta berriro adierazi du kalitatezko exekuzioa eta inguruko bizilagunekin komunikazio egokia bermatzea lehentasuntzat jotzen duela.

Bestetik, Aranzubi kaleko arrapala mekanikoen lizitazioa hutsik geratu dela ere jorratuko da. Udal talde jeltzaleak konpromisoa hartu du irisgarritasuna hobetzeko bide berriak aztertzen jarraitzeko.

“Herritarren egunerokoan eragina duten proiektu zehatzek osatzen dute gaurko Osoko Bilkuraren ardatza. Udal gobernutik lanean jarraituko dugu Urnieta egunero pixka bat hobea izan dadin”, adierazi du Urnietako Uri Buru Batzarrak.