Imajinatu zer suposatuko zukeen Hondarribiarentzat bere kirol-instalazioak dauden lurrak "itsasora itzultzeak". Hondartzako kirol-instalazioetako lursailei buruzko ziurgabetasun horrek urteak daramatza mahai gainean, eta ezin izan da ez inbertsiorik ez hobekuntzarik egin, Trantsizio Ekologikoko Ministerioak blokeatu egiten baitzituen proiektuak.

Gai honen garrantziaz jabetuta, Kongresuko EAJ-PNV taldeak Pedro Sanchezen inbestidura akordioan sartzea lortu zuen. Hondarribiko EAJ-PNVtik bereziki eskertzen diegu Aitor Estebani eta Madrilgo taldeari egindako lanagatik eta erakutsitako konpromisoagatik. Akordio honek erakunde guztietan ahotsa eta erabakitzeko ahalmena izatearen garrantzia erakusten du.

Hurrengo urratsak eta etorkizuneko proiektuak

Joan den ostiralean, Espainiako Gobernuak espediente horretan aurrera egiteko administrazio- prozedura hasi zuen, eta Hondarribiko Udala izango da izapideekin jarraituko duena. Prozesu hori arintzeko udal gobernuarekin elkarlanean aritzeko prest gaudela berretsi nahi dugu.

Bien bitartean, funtsezkoa da Udalak azken urteotan bertan behera utzi behar izan dituen proiektuei berriro ekitea, hala nola, Hondartza futbol zelaian belar aldaketa eta kiroldegiko instalazioak hobetzeko inbertsioak. 

Hala ere, duela hilabete batzuetatik hona, udal gobernuak ez die jakinarazi oposizioko taldeei, ezta herritarrei ere, kiroldegiaren kudeaketa Udalera pasatzeko prozesuaren aurrerapenari buruz.

2024an hori gertatuko zela agindu bazen ere, 2025eko martxoan oraindik ez dugu horri buruzko berririk.