Irurako Udal Gobernuak aurkeztutako anbizio politikorik gabeko aurrekontu proposamen kontinuista baten aurrean, EAJ-PNVk beharrezkoak diren hainbat proiektu egingarri aurkeztu ditu, helburu nagusi batekin: udalerriaren garapena bultzatzea eta irurar guztien ongizatea bermatzea. 

Urte hauetan, EH Bilduk ikuspegi estrategikorik eta anbizio politikorik ez duela erakutsi du. Izan ere, Ana Leunda alkate zela EAJ-PNVk diseinatutako proiektuak burutzera mugatu da, edo EAJ-PNVk aurkeztutako proposamenak inplementatu ditu, aldez aurretik sistematikoki baztertuak izan badira ere.

Hori horrela, alderdi jeltzaleak azpimarratu du 2025eko aurrekontuak aukera berri bat direla herritarren beharrei erantzuteko eta Irura indartzeko: “horregatik, EAJ-PNVk, batez ere, gizarte-politiketan eta garapen ekonomikoan oinarritutako ekimenak gehitzea eskatu du”.

Etxebizitza, kolektibo ezberdinentzat

Gizarte arloan, etxebizitzarekin estuki lotuta, EAJ-PNVk proposatzen du alokairurako diru-laguntzak indartzea eta ordenantza zabaltzea: “irurarren egungo errealitate sozioekonomikoetara egokitutakoak izan behar dute” Hori horrela, eta lehentasuna gazteengan mantenduta ere, alderdi jeltzaleak dio laguntza behar duten beste kolektibo batzuei ere zabaltzea ezinbestekoa dela: “hala nola mugikortasun arazoak dituzten eta etxez aldatu behar duten pertsonak, dibortziatuak edota babes bereziko mailaren bat dutenak, besteak beste”. 

Etxebizitzaren arazoari aurre egiteko, EAJ-PNVk funtsezkotzat jotzen du Irurako etxebizitza-parkearen azterketa sakona egitea. Azterlan horri esker, etxebizitza hutsak izatearen arrazoiak aztertu ahal izango dira. Jeltzaleek azterketa hori etxebizitza hutsak mantentzeagatik ezarritako errekargutik datozen diru-sarrerekin finantzatzea proposatu dute.

Apaiz-Etxea, aukera

Azken urteetan ematen ari den enpresa kopuruaren jaitsierari eta tokiko ehun ekonomikoaren ahultzeari erantzunez, EAJ-PNVk proposatu du Apaiz-Etxea eraikina eskuratzeko aukera aztertzea, izan salerosketa bitartez, edota bideragarriak izan daitezkeen beste formula batzuen bitartez. 

Talde jeltzalearen esanetan, “eraikin hori gizarte-zerbitzuen garapenerako edo Iruran enplegua eta zerbitzu berriak sortzen dituzten sustapen ekonomikoko proiektuetarako erabil daiteke”. Ildo horretan, lanpostuak sortzea sustatuko duen, turistak erakarriko dituen eta enpresa-eremuari mesede egingo dion hotel-proiektu bat bultzatzeko ideiari berriro heltzea proposatu dute jeltzaleek.