Aberri Eguna 2024

Gipuzko Buru Batzarra

Berriak

Ezagutzera eman
2016/06/11

“Euskal eredua” eskaintzen du EAJk

Espainiatik datorkigun ikuskizunezko politikari eta immobilismoari aurre egiteko kudeaketarako “euskal eredua” hain zuzen ere

Kudeatzeko “euskal eredua” eskaintzen du EAJ-PNVk “Espainiatik datorkigun adostasunerako ezgaitasuna, immobilismo, marra gorriak, alderdikeria eta ikuskizuneko politikari” aurre egiteko. “Euskal eredua, proposamenak eta elkarrizketa oinarri dituen eredua, euskaldunen bizi-kalitatea hobetzeko adostasunak lortzea nahi duen eredua da” azaldu du Joseba Agirretxeak.

Orion egin ditu, gaur, adierazpen horiek EAJ-PNVko zerrenda buruak. Ondorio horretara iritsi da, euskal erakundeak eta erakunde espainolak egiteko dituzten modu diferenteak ezagutu eta gero. “Espainiako gobernuak Kofradia Zaharra – bertako nortasunaren erreferente dena – puskaka hautsi dadin uzten ari den bitartean, udalerrien aldeko apustua egiten ari dira euskal erakundeak” azaldu du, “Ontziola zaharra berritzeko inbertsioak eginez, esate baterako”. “Gipuzkoan eta Euskadin zehar aurki ditzakegun ehunka adibideetako bat besterik ez da hori” erantsi du.

“Gu geu gara euskaldunen eskubide eta interesak defendatzen ditugunak” azpimarratu du, “zure herriaren ordezkari izan nahi baduzu, sentitu egin behar baituzu; eta guk, herri hau ezagutzen dugu, errespetatzen dugu eta sentitzen dugu”.

“Azken hamarkadetan, PNV izan da bai Kongresuan, bai Senatuan euskaldunen eskubide eta interesak defendatu dituena” esan du eta hori “talde eta bozeramale sendoak izan ditugulako izan da”. “Horrexegatik, ordezkaritza sendoa izaten segitu behar dugu, garrantzia handia du horrek” ohartarazi du. Datozen hauteskundeen garrantzia nabarmendu du, “izan ere, gaur egun, oraindik ere, Madrilen hartzen diren erabaki asko eta askok eragin zuzena dute gugan, eta Espainiak etengabe uko egiteak, makaldu egiten du herri izateko dugun aurrerabidea”. “Nork bere alderdiaren interesak aurretik jarrita, beraien artean ados jartzeko gai ez badira, nola lotuko dute adostasunik gurekin?” adierazi du.

Horregatik guztiagatik, “Espainiatik datorkigun EZ horri aurre egiteko, bada garaia “piztu” botoia sakatu eta egoerari buelta emateko” azaldu du, “eta PNV da aldaketa hori lideratzeko gai den alderdi bakarra, eta euskal herritarren borondatea eta gure erakundeen erabakiak Madrilen errespetarazteko gai den bakarra”.

Joseba Agirretxea eta Maria Eugenia Iparragirre buru zirela, Orio, Zumaia eta Getarian izan dira gaur Kongresurako eta Senaturako EAJ-PNVko hautagaiak, herri horietako ordezkari jeltzale nagusiak lagun.

Ezagutzera eman

Nabarmenak...

Berri ikusiagoak...

YouTube