Pello Elorzak, Azpeitiko EAJ-PNVren presidenteak, Aitor Gorrotxategi, udal taldearen bozeramaile eta alkatetzarako hautagaiarekin batera, alderdi horrek datozen hilabeteetan, “Azpeitia Prest” ekimenaren barruan egingo dituzten lan-jardunaldi desberdinak aurkeztu ditu, “kudeaketa eraginkor batean oinarrituta Azpeitiarentzat alternatiba ireki, parte-hartzaile eta integratzailea” taxutu ahal izateko.

Alde horretatik, aurreratu du datozen egun eta asteetan kargu nazionalista, gizarte eta ekonomia arloko eragile eta herritar desberdinekin Azpeitiaren gaur eguneko errealitatea aztertuko eta landuko dutela, gaur egunean gure herriak bizi duen egoeraren erradiografia zehatz eta zorrotza izateko”

Aitor Gorrotxategik, jeltzaleen hautagaiak, bere aldetik, adierazi du bilera eta ekimen horietan guztietan hartuko duela parte, “entzun eta ekarpenak egiteko jarrerarekin” “Azpeitiak behar duen alternatiba berria eratu ahal izateko. Horregatik, enplegua eta berpizte ekonomikoa lehentasunezkoak dira gure proiektuan”.

Gorrotxategik adierazi du topaketa horietan lehenengoa datorren asteazkenean, ekainak 11, izango dela, Bakartxo Tejeria, Eusko Legebiltzarreko presidentearen eta Imanol Lasa, aurreko legealdian Gipuzkoako Foru Aldundian Partaidetzako zuzendaria izan zenaren eskutik, Gobernu Onaren inguruko puntuak lantzeko, “Azpeitiak elkar hizketan eta akordioan oinarritutako kultura politikoa behar duelako”.

Bozeramaile jeltzaleak aitortu du “benetako parte-hartze bat bultzatu beharraz erabat konbentzituta dagoela, herritar oro konprometituz kudeaketa publikoan eta lidergo partekatua bultzatuz gaur eguneko arazoak gainditzeko eta ilusioa sortzeko”. Alde horretatik, adierazi du “gardentasunaren, kudeaketa eraginkorraren eta administrazio desberdinen arteko elkarlanaren aldeko apustua egiten duela, eta jarrera eraikitzaile baten alde, kudeaketa publikoan portaera etikoa bermatzeaz gain”.

Bigarren jardunaldi batean, uztailean, gizarte politiken eta horien iraunkortasun eta jasangarritasunaren gainean eztabaidatuko dute, Eider Mendoza, Gipuzkoako Batzar Nagusietako presidente ordearen, eta Maite Peña, Errenteriako bozeramaile jeltzalearen eskutik. Gai honi dagokionez, Aitor Gorrotxategik “ezinbesteko” jo du arlo publiko eta pribatuaren arteko lankidetza, sistemaren etorkizuna bermatu ahal izateko, eta Gipuzkoan arreta erresidentzialaren arloan dagoen ekimen sozial handia aprobetxatzearen alde agertu da, biztanleriaren pixkanakako zahartzeak sortzen dituen erronkei aurre egiteko”.

Horrez gain aurreratu du lanean ari direla Arantza Tapia ere Azpeitian izan dadin “Eusko Jaurlaritzatik bideratzen ari diren ekimen-lerro desberdinen berri izan eta haiek aztertzeko, industriari eta merkataritzari laguntzeko ekimen zehatzen bidez ekonomiaren sustapenean modu eraginkorrean eragin ahal izateko”.

Amaitzeko adierazi du oinarri horiek kontuan izanda “lan-talde bat eratu duela Azpeitiak dituen erronkak aztertzeko, eta hor aterako diren ondorioak datozen hilabeteetan kontrastatu egingo dituela gizarteko eragile eta sektore desberdinekin et ahalik eta azpeitiar gehienekin”.