• 09 URR 17

    Berdintasunean erreferente den NBEko aditu batekin partekatu du Etorkizuna Eraikiz Aldundiak

    Gipuzkoako Foru Aldundiak, ASPEGI emakume enpresarien elkarteak eta Fiza Farhan nazioarteko adituak, NBEtako aholkularia eta berdintasun arloan mundu mailan erreferente dena, topaketa egin dute gaur Donostian, emakumearen ahalduntze ekonomikoa izan dutelarik hizpide. Foru erakundeak antolatu du topaketa, Etorkizuna Eraikiz programaren testuinguruan. Parte hartzaile guztiek nabarmendu dute arlo ekonomikoan egiteko asko dagoela oraindik ere, “batez ere Gipuzkoarentzako hain garrantzitsu den industrian”. Zentzu honetan, Farshanek nabarmen du “garapen ekonomikoak emakumearen ahalduntzea behar duela, baita Gipuzkoako industriaren garapenak ere”.

    Nazioarteko aditua Gipuzkoan da egunotan Baltistan Fundazioak gonbidatuta. Gobernuz Kanpoko Erakunde honek Pakistan iparraldean dagoen Baltistan eskualde malkartsu eta isolatuan egiten du lan, bertako Hushé bailarako biztanleen giza garapen oso eta endogenoaren alde. Elkarteak Gipuzkoako Foru Aldundiaren Berdintasun eta Garapenerako Lankidetzako zuzendaritzen babesa dauka. Farhan munduko mailan erreferente da berdintasun eta emakumearen ahalduntzearen arloetan. Besteak beste, Munduko Garapen Estrategikoko aholkularia da, NBEn Emakumearen Ahalduntze Ekonomikoari buruzko Goi Mailako Paneleko kide eta Punjabeko Emakumeen Ahalduntzerako Lan Taldeko presidentea. 

    ASPEGIrekin izandako topaketaren aurretik, lan bilera izan du Foru Aldundiko hainbat kiderekin: Imanol Lasa foru bozeramailea; Ainhoa Aizpuru, Ekonomia Sustapeneko diputatua; Miren Elgarresta, Berdintasuneko zuzendaria; eta Fernando San Martin, Garapenerako Lankidetzako zuzendaria. Bilerak Etorkizuna Eraikiz programa izan du ardatz, Farhan txalotu duen ekimena. “Ikuspegi estrategikoa eta beharrezko erremintak ditu, eta guztien parte hartzea aurreikusten du”, azaldu du. Aldi berean, Aldundiak “benetako berdintasunaren alde” egiten duten apustua nabarmendu du: “proiektu aitzindari honek ez die arazo guztiei erantzuna emango, baina ziur nago bide honetatik Gipuzkoak aurrerapauso erraldoia emango dutela berdintasunaren arloan”.

    Lasak, bere aldetik, ekimena xehatu du, bere metodologia eta proiektu esperimentalak mahai gainean jarriz. Bereziki kontziliazio eta berdintasunaren inguruan egiten ari den lanean jarri du azpimarra, gogoratuz Aldundiarentzako gai hauek berebiziko garrantzia dutela: “oso garrantzitsua da esparru honetan eragitea gipuzkoar guztien, gizon zein emakume, garapen ekonomikoa eta pertsonala bermatzeko. Gure helburu nagusia Gipuzkoa lurralde aurreratu eta lehiakorra izatea da, pertsona eta ongizatea politika guztien ardatz direlarik”.

     Azkenik, Elgarrestak gogoratu duenez, urte bukaerarako 2.000 pertsona baino gehiago izango dira Aldundiak berdintasuna sustatzeko egin dituen proiektu pilotuetan parte hartu dutenak, “gipuzkoarren kezka eta inplikazio maila agerian uzten duen zifra”. Elgarrestak nabarmendu du Aldundiak konpromiso irmoa duela berdintasunarekin, “horregatik jarri ditugu martxan hainbat neurri eta plan ezberdin”. Berdintasuneko zuzendariak Aurre! indarkeria matxistaren aurkako Plana eta Kontziliazio Erantzunkiderako Foru Plana nabarmendu ditu Berdintasunerako zuzendariak, Etorkizuna Eraikizen baitan kokatzen diren ekimenak eta emakume eta gizonen arteko egiazko berdintasuna lortzea xede dutenak.